KKDM merr pjesë në takimin për menaxhimin e rrezikut nga përmbytjet në Qarkun Korçë

Më 5 tetor 2026, në Bashkinë Maliq, u zhvillua mbledhja e Organit Këshillimor të Prefektit të Qarkut Korçë me temë “Menaxhimi i rrezikut nga përmbytjet në Qarkun Korçë: analiza e shkaqeve, masat parandaluese dhe koordinimi ndërinstitucional”, ku Komiteti Kombëtar i Digave të Mëdha (KKDM) mori pjesë me përfaqësuesit e tij.

Në cilësinë e Kryetarit të KKDM-së, z. Ardian Islami falënderoi Prefekten e Qarkut Korçë, Dr. Florinda Zegullaj, për iniciativën, organizimin dhe fjalën hapëse të takimit, në të cilën u evidentuan në mënyrë të detajuar angazhimet e nevojshme të qeverisjes vendore për garantimin e sigurisë dhe mirëfunksionimit të rreth 41 digave të mëdha dhe 81 digave të vogla që përdoren dhe shfrytëzohen nga bashkitë e Qarkun Korçë.

Një falënderim i veçantë iu drejtua gjithashtu Kryetarit të Këshillit të Qarkut Korçë, si dhe kryetarëve të bashkive të qarkut, për pasqyrimin e problematikave konkrete të hasura në terren, veçanërisht në lidhje me sigurinë, mirëmbajtjen dhe operimin e digave.

Po ashtu, Kryetari i KKDM-së vlerësoi praninë e ekspertëve të fushës dhe theksoi se kishte nderin të pasonte në këtë detyrë një nga figurat më të spikatura të sektorit të digave në Shqipëri, z. Arjan Jovani, aktualisht President i EURCOLD. Ky fakt përbën një tregues të qartë të nivelit të lartë profesional të ekspertizës shqiptare në fushën e sigurisë së digave dhe të vlerësimit në arenën ndërkombëtare.

Nga ana e KKDM-së u evidentua se, sipas regjistrit të përditësuar për vitin 2025, nga gjashtë bashkitë që administrojnë dhe shfrytëzojnë diga në Qarkun Korçë, vetëm Bashkia Kolonjë ka dorëzuar informacion për digat e mëdha dhe pjesërisht për një numër digash të vogla. Gjithashtu, kjo bashki ka zbatuar pjesërisht vendimet e KKDM-së, duke ngritur Njësinë e Drejtimit Teknik për Sigurinë e Digave.

KKDM theksoi nevojën e një angazhim më të madh nga të gjitha bashkitë për përmbushjen e kërkesave ligjore dhe teknike që lidhen me sigurinë e digave. Kjo përfshin përditësimin e pasaportave të digave, dorëzimin pranë KKDM-së të rregulloreve të shfrytëzimit, hartimin dhe përditësimin e planeve të emergjencës, monitorimin e vazhdueshëm të objekteve, si dhe paraqitjen e raporteve vjetore teknike.

Në përfundim, Kryetari i KKDM-së, z. Ardian Islami, shprehu gatishmërinë e plotë për të forcuar bashkëpunimin me Institucionin e Prefektit të Qarkut Korçë dhe me të gjitha bashkitë e qarkut, me qëllim rritjen e standardeve të sigurisë së digave, minimizimin e rreziqeve nga përmbytjet dhe përmirësimin e monitorimit dhe administrimit të veprave ujore.

Takimi u zhvillua në Qendrën Kulturore Komunitare ‘Dhimiter Orgocka”, Bashkia Maliq